Oleh: sastraindonesiaunand | Desember 14, 2007

NAGARI

NAGARI

Oleh Tek Siaryet.jpg

Malam tu Pak Camat kadatang ka Surau Ikhlas. Kabanyo Pak Camat kamaagiah panarangan ka masyarakat baraso awak kabanagari baliak. Etek Siar pai pulo ka surau nak mandanga Pak Camat. Guru nan kamangaji malam tu dari Padang bana lai.

Sabalun guru tu bacaramah, Pak Camat bapidato dulu. Kato Pak Camat, awak kabapamarentah nagari baliak. Indak desa lai. Kapalo nagarinyo wali nagari pulo baliak.

“Jadi nagari awak ko diatur jo caro awak baliak, bawali nagari, bapangulu. Kok indak, kini bana kan lai bapangulu juo awak ko-a. Tapi kurang peran baliau ko nyo. Kok batangka urang baradiak-kakak kini, ka polisi inyo mangadu; indak ka mamaknyo, do; indak pulo ka pangulu, do” kato Pak Camat. Etek Siar iyo katuju bana dek baliau kok babaliak kanagari baliak. Wali nagari ko bukan urang nan bakuaso; tapi urang nan arih bijaksano, urang nan dituokan. Tau dibateh ulayat rakyat-e; tahu dikaum kirabat rakyat-e. Nan pangulu bitu pulo; kalau ari pakan, pangulu ko duduk dakok balai-balai. Ma nan tampak kamanakan-e, disapo-e; ditanyo “Lai kabalai mande ang?”. Dalam pado Etek Siar tamanuang tu; lah tadanga sajo urang manyolang, si Deh anak Muncak. Inyo batanyo, tapi indak tatangkok dek Etek Siar do sabab bahaso-e tinggi bana, “… teritori politik. Jadi baa tanah ulayat nagari ko nan di bukik Payo tu Pak? Pai batompangan harato ninik moyang awak ka ki-in? Manuruik pamahaman ambo, Pak; nagari ko bukan wilayah politik, do. Iko wilayah nan bamulo dari satuan ekonomi, kamudian satuan kulrural. Mako tidak ideal kalau pamarentah mamikia-an sistem banagari ko samato-mato sistem pamarentahan” kecek si Deh ko.

Sabananyo Etek Siar indak mengarati bana jo nan dikecek-an dek si Deh ko do. Tapi lai tarang-tarang lareh. Etek Siar ko yakin bana baraso adat banagari paga nagari, adat badunsanak paga dunsanak. Kok tanah nan di Bukik Payo tu, Etek Siar lai tau baraso tanah tu taruko urang gaek daulu. Tanah tu diakui dek urang Payo baraso ulayat urang Simpang. Jadi a nan ditanyoan dek si Deh cako tu?

Pak Camat lai manjawab. Tapi si Deh ko manyolang pulo baliak, “Bateh nagari Simpang indak di Banda Imang tu do, Pak. Manuruik urang Simpang ko, ulayat nan di Bukik Payo tu, Nagari Simpang juo lai; ateh kuaso adat urang Simpang juo lai. Mungkin Bapak paralu tau itu dek karano Bapak tantu alun tau lai” nyo inyo manukeh. Indak jaleh dek Etek Siar etongan si Deh ko do. Nan jaleh dek Etek ko, sajak dulu si Lapoh, si Lamiun, si Rubai lah baladang di Bukik Payo.

lyo indak mangarati Etek Siar do. Nan tabayang dek Etek Siar, kok banagari awak baliak, baa urang nan barumah dari Gaduang Batu ka Musajik Aua Duri, tu? Itu, sado-e urang datang tumoh. Labiah sakilo panjang-e. Bara rumah, tu. Urang datang, urang kayo. Kamanga pangulu jo inyo; kamanga wali nagari ko; lai kasamalu inyo jo awak. Kok mandapek malu urang Simpang ko, lai kasamo sakik inyo jo awak. Lai indak kapulang ka nagari-e inyo kok nagari awak dapek kamalangan? Tanah nan dibali urang tu di tapi jalan sado-e. Baa tanah nan di balakang-e. Kok nyampang batenggang ka tanah tu isuak, tantu katajua murah. Urang tantu anggan mambali dek karano indak ado jalan. Itulah, indak ditungkuik ditalantangan dulu kamanjua tanah. Desa indak pulo maingek-an. Pangulu indak pulo manyapo. Jadi a kolah pangulu.

Pangajian guru malam tu indak tamasuak diaka Etek Siar, do; sabab nan dijalehan-e kataatan ka pamimpin. Jadi turuik-an sae a nan dikecek-an Pak Camat tu. Baa mangko kadituruik-an? Pak Camat sae indak urang Simpang, do; inyo urang Pasaman. Ma abeh dek-e bateh nagari Simpang.

Katiko pulang, Etek Siar samo jo si Deh. Nyo tanyo baliak nan dipakecek-an dek si Deh cako “A nan minantu tanyoan cako tu? Kan ladang nan di Bukik Payo tu lai tanah urang siko, ndak? Kadiambiak pulo dek pamarentah, bitu?”

“Indak bitu do, Mak Tuo. Kok caro nan dibuek dek pamarentah kini sae awak ikuik-ikuik, a; namuah urang Singkarak nan jadi wali nagari awak tumah. Sabab nan dipikia-an dek pamarentah sistem; caro. A caro-e? Banagari. Sia sae, dari ma sae juo andak-e, bisa jadi wali nagari di siko. Sabab iko aturan pamarentah, bukan aturan adat. Lai namuah Mak Tuo takah itu? Lai namauh Mak Tuo bawali ka urang Singkarak?”

“Teang, baa mangko bitu? Indak mungkin tu do. Nagari, nagari awak. Elok buruak nagari ko, elok buruak awak. Kok urang Singkarak jadi wali nagari, tantu pangulu awak saparetah urang Singkarak pulo; tantu adat awak diatur dek urang Singkarak pulo. Indak kamungkin tu do. Namuah jalan dialih urang lalu tumoh, cupak dialiah urang manggaleh” kecek Etek Siar.

“Kan itulah dek Mak Tuo, a. Kalau dianggap wilayah pamarentahan sae nagari ko dek pamarentah, itu jadi-e. Bisa pulo urang Singkarak jadi wali nagari Simpang ko. Kok indak, urang Pasaman takah Pak Camat kini’.

“Tapi nagari. Kok nagari, tantu diatur dek urang nagari ko. Sabab nagari ko punyo adat sandiri, ado pangulu sandiri, punyo tanah ulayat sandiri. Tantu nan tau jo itu urang siko. Tapi alah dietong; adat salingka nagari”

“Itu mangko ambo solang Pak Camat”

“Dek den nan takana pulo ciek lai; kalau banagari awak, urang takah mantari Buih tu, baa, tu. Inyo urang datang di siko. Suku-e, datuak-e tantu di nagari inyo. Kok iyo bana inyo kamangaku mamak di siko, kok malu urang siko lai kasato malu inyo. Kok gotong royong banda urang, lai kasato inyo. Jan katiko baralek sae nan kasato”

“Banyak etongan-e lai Mak Tuo. Ado soal SDM, SDA…”

“A tu?” Etek ko lah capek pulo manyolang.

“Iyo; caro kahidupan. A nan kajadi sumber kahidupan awak di nagari ko. Kok kamambangun nagari ko, dan ma pitih-e. Itu musti dipikia-an kalau banagari. Nan katibo ko sarupo itu, Mak Tuo. Indak ado bantuan dari pamarentah pusat lai, do. Kok kamamarentah, kok kamamikia-an kahidupan, adat, pambangunan, sia urang-e. Indak banagari-banagari sae do, Mak Tuo”

“Iyo pulo, yeh”

BP, 17-23 Juli 2000


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: