Oleh: sastraindonesiaunand | Desember 14, 2007

GURU LES

GURU LES

Oleh Tek Siar

yet.jpgSi Ati anak Etek Siar datang ka rumah amak-e. Ari lah agak patang. Inyo maanta-an samba saketek untuak amak-e tu. Kalau mambuek asam padeh lauak Padang* tu, takana juo amak-e tu dek-e. Diantai-e amak-e tu duo saik. Indak mungkin diagiah sasaik sae sabab di rumah tu ado pulo anak si Tian, adiaknyo. Urang gaek ko biaso-e sanang bana makan samo-samo jo cucu. Kalau diagiahan Sr-.e kasado-e ka cucu-e indak dapek pulo urang gaek tu beko. Mako diagiahnyo sajo duo saik. Si Ati acok juo maanta-an samba ka amaknyo sajak lah bapisah rumah ko. Alan sataun inyo tingga di rumah barunyo di Gunuang-gunuang.

“Iko samba saketek de amak-a” kecek si Ati. “Samba a kau buek?” kecek Etek Siar batanyo.

“Lauak ikan Padang. Ayah si Roni cako pai ka rumah sakola-e; kanai panggia dek guru. Inyo singgah di pasa, nyo bali lauak. Tu, Ati buek asam padeh. Takana pulo amak”

“Manga Panduko ka rumah sakola si Roni. Bacakak pulo-e?” Etek Siar batanyo agak cameh.

“Indak. Guru barundiang jo urang tuo murik, manyuruah anak-anak ko les patang ari, sudah sakola. Si Roni kan kini lah klas tigo. Jadi disuruah les. Kecek guru-e les ko untuak manyiap-an anak-anak ko ujian isuak. Jadi dilatiah dulu kini” “Lai indak mambayia?” batanyo juo Etek Siar.

“lyo. Mambayia pulo sabulan antah anam ribu antah lapan ribu. Bara tu kecek ayah-e”

“Les tu manga? Kan sakola patang tu, ndak?” “lyo”

“Tu, mambayia pulo, tu?” Dalam urang tu mangecek-ngecek datang si Diar maanta-an dulang. Dulang tu disalangnyo dari Etek Siar katiko baralek marapulai adiak-e, si Edi.

“Lai salamat sae alek kau” kecek Etek Etek Siar batanyo. “Saalah lai, Tek. Iko ambo maanta-an dulang. Tarimo kasi tek-a” kecek si Diar. “Kau manga cako ko, Ati?” Kecek si Diar ka si Ati. “Indak ado, do. Mancaliak amak”

“Kau pai ka rumah sakola si Roni? Ambo alun lai. Ayah si Pun ka sawah pulo cako, mambao urang manarah pamatang. Jadi indak ado kami nan pai, do” kecek si Diar agak bakaluah kasah.

“Ayah-e sae si Roni-nyo. Ambo ka sawah pulo mambao urang batanam. Jadi pulang sakola cako kadapua pulo lai mambuek paminum kopi urang sawah. Itu mangko ayahe si Roni nan pai” jawab si Ati. Si Ati ko guru SD, lai pulo dapek maaja di kampuangnyo.

“Tu, a kaputusan-e?”

“Kecek ayah si Roni, anak-anak disuruah les patang ari, untuak mampasiap-an ujian. A tu mambayia pulo anam ribu sabulan”

“Nde, pitih juo lai yeh. Baalah sakola kini, pitih sae tiok sabanta. Isuak kok tamat SMU, pitih juo lai. Tamat itu alun tantu dapek karajo lai” kecek si Diar.

“Oeh, kok indak karajo kantua tu anak kalian baa nyo? Paniang bana dek mamikia-an karajo” kecek Etek Siar manyolang.

“Indak karajo kantua indak baa do, Tek. Pangka-e lai bisa iduik dari rasaki nan ala, alah tumoh”.

“Tu a lai. Bayia saelah, buliah nak tamat anak kau”.

“Tantu iyo bitu, Tek. Baa juo lai. Kok indak bitu, indak pulo lulus anak awak biko. Di Padang nan bedo bana lai, Tek. Anak uda Rusman, mah. Les musti ka rumah guru, mambayia limo baleh ribu sabulan, ciek palajaran. Tarangah uda Rusman dek-e. Kapatang ko liau pulang manyalang pitih amak”

“Teang; lai banyak pitih amak kau bitu, mangko si Suman mintak pitih ka inyo” kecek Etek Siar manyolang.

“Indak bitu do, Tek. Pitih bali karambia nan di Parak Lantak. Biaso-e pitih tu dek amak saenyo. Sakali itu dimintak uda” si Diar bacarito. Sudah taaniang sabanta, inyo tambah juo caritonyo dek si Diar “Kawan anak uda tu nan bedo pulo, Tek. Di rumah sakola paja tu pandai. Tapi ponten-e randah taruih. Di lapor-e cawu satu dulu merah bagai. Anak-anak nan lain nan labiah bodoh dari inyo rancak ponten-e, tapi anak tu pai les ka rumah guru-e tu. Jadi rancak nilai-e”

“Manga namo-e guru takah itu, tu. Manggaleh” kecek Etek Siar agak mambirunguik. “Ganjia pulo; guru menggaleh kapandaian. Kok kato den-a, guru

tu urang nan molea. Inyo maaja urang sampai pandai. Tapi lai disabuik dalam kaji; baramulo, apo bilo mati anak adam, abih sagalo amal kacuali tigo. Ilimu nan baguno, tamasuak. Bato pulo guru kini” Etek Siar lah bakatubah pulo.

“Tapi iyo pulo tumah, mak. Bara gaji guru dek amak ko. Tapi Ati marasoan; iyo guru SD, a. Sakali sataun indak baa inyo mamunguik uang les saketek dari murik do. Saketek. Uang kopi. Dek anak awak tantu indak pulo barakat ilmu nan indak dibayia, do. Ilmu nan didapek dari ibo ati urang, upek urang” kecek si Ati. Tampaknyo si Ati lai paham, dan satuju jo pambayaran les.

“Kalau nan patuik-patuik indak baa do, Ti. Tapi kalau musti mambayia bapuluah ribu pulo, iyo lah manggaleh guru tumoh. Ilang jaso-e dek pitih nan saketek tu. Indak hormat urang ka guru lai do. Tantu kecek urang, guru bisa dibayia. Ponten anak bisa dibayia. Sado-e bisa dibayia. Kok caro kasa, kan bisa pulo awak mengecek-an tu; ‘Lai mah nak jadi urang kayo, baniago monah, jan jadi guru'”

BP, 19 – 25 Juni 2000

*) Lauak Padang: ikan tongkol


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: